星粉VS靚模

近排多左睇本地波，有時我真係想問一個問題，大家入場係睇咩波呢??老實講，香港足球沈左好耐既氣氛都唔係呢一兩年既事，要攪好香港既足球，第一樣野梗係要提升球賽既可觀性，即係球隊既實力，呢幾年我眼見其實好多球隊都不斷咁進步，唔會話得一兩支球隊獨大。

所謂球賽既可觀性，唔知點解呢一兩年出現左個美女打氣現象，球圈人士連看台上既可觀性都顧埋，即係好似F1賽車咁，有賽車女郎，咁當然呢D美女一定無賽車女郎咁SEXY啦，不過就好肯定一句：「青春唔係無敵，不過一定好煞食」。現時黎講，除左南華會用星粉之外(即係有名氣既藝人)，其餘球隊都會有美女打氣OR 靚模啦啦隊。連傑志今年都有公主............

問心，其實如果果位小姐係本身支持果支球隊既話，我又唔介意有佢地既出現，但如果要球會專登俾錢請靚模，我就唔係咁同意......大佬，我入場睇人踢波定睇你對波先，你話傑仔(傑志吉祥物)行出黎，我都可以去同隻雀影下相，如果我專登走埋去阿大埔LULU或者天水圍旦旦度要求合照.......你估我返唔返到屋企??