勝利球迷

響我身邊好多朋友都會喜歡睇足球賽事，大家都會有心愛既球隊。但其實大家點解會支持，又或者係愛上一隊波呢?細個果陣既理由好簡單，邊隊成日嬴咪支持邊隊LAW。咁如果支持果隊波輸波呢?咪轉撐另外一隊LAW~大個左之後，繼續都有睇足球賽事，大家都知我係英超既車路士死忠派，原因好簡單，打得好睇。回味的是摩帥的年代，但今季保帥帶兵的成績，唔通要迫我改投曼聯懷抱?以前可能會，但支持左車仔咁耐，總會希望同球隊高低一起。同樣地，傑志今季都有踢得差既時間，但作為支持者係咪應該背後叫加油，而唔係一輸波就倒戈相向呢?

初生之犢不畏虎

今晚響九龍灣場上演既劇碼係傑志VS港菁，賽前大家都一致認為，傑志係班霸，港菁只係一班響球會踢唔到正選既青年球員，但今晚就示範左咩野叫做初生之犢不畏虎。

先講傑志，列文好明顯又係雷大雨點少，今場既表現絕對係唔對版，如果UBAY肯留低，效果一定好過列文。另外雅高同迪亞斯，雖然有波入，但都浪費左好多個機會，門前飛機既次數多到我都數唔曬。梁子成一讚既係入第二球既關鍵，有膽色爆開拿武斯出到俾雅高入波。但推人食左張黃牌要打PAT PAT。大昆哥就......唉~~~~~

港菁就反而踢得好好，拿武斯真係無得頂AR~~而且成隊波踢得好順，完全唔係一面倒俾傑志禁住踢，香港未來既足球就係你地啦!!!!

終需一敗

今日係港甲既重頭大戰，南華VS傑志，基本上，香港波黎講，主客制我覺得係多餘既，香港有幾大?同埋球隊練波都唔會響自己主場既，所以話就話南華係主場，但我唔覺有咩優勢。結局係，傑志終於一敗......
你話如果係傑志打得衰而輸，心甘命抵，但都係老一輩既金句：「波係圓既」，至少可以話你聽，控球多過對面，組織做得好過對面，無尖刀就係無尖刀，全攻型球隊既死穴咪就係俾人打突擊LAW~
你可以話南華嬴得好難睇，雖然我都覺得係，街波仔，死守等機會，有空位就篤個波波上去，跑得快入到禁區搏到12碼就得啦，你唔好理南華係咪踢得烏龜，都係戰術。怪就怪自己點解睇溜左對方既後衛祖爾，邊個話後衛唔可以入波GA??

星粉VS靚模

近排多左睇本地波，有時我真係想問一個問題，大家入場係睇咩波呢??老實講，香港足球沈左好耐既氣氛都唔係呢一兩年既事，要攪好香港既足球，第一樣野梗係要提升球賽既可觀性，即係球隊既實力，呢幾年我眼見其實好多球隊都不斷咁進步，唔會話得一兩支球隊獨大。

所謂球賽既可觀性，唔知點解呢一兩年出現左個美女打氣現象，球圈人士連看台上既可觀性都顧埋，即係好似F1賽車咁，有賽車女郎，咁當然呢D美女一定無賽車女郎咁SEXY啦，不過就好肯定一句：「青春唔係無敵，不過一定好煞食」。現時黎講，除左南華會用星粉之外(即係有名氣既藝人)，其餘球隊都會有美女打氣OR 靚模啦啦隊。連傑志今年都有公主............

問心，其實如果果位小姐係本身支持果支球隊既話，我又唔介意有佢地既出現，但如果要球會專登俾錢請靚模，我就唔係咁同意......大佬，我入場睇人踢波定睇你對波先，你話傑仔(傑志吉祥物)行出黎，我都可以去同隻雀影下相，如果我專登走埋去阿大埔LULU或者天水圍旦旦度要求合照.......你估我返唔返到屋企??

好戲在後頭

尋日響旺角場睇完公民VS傑志之後，晚上響元朗大球場上演左一場娛樂性豐富既賽事，兄弟班，天水圍飛馬VS南華。基本上呢兩隊波次次對賽我都係覺得唔睇都把啦，前幾年直頭覺得天水圍飛馬根本就係南華2隊，只不過係南華將唔要既人借或者放過去之MA。但真係估唔到，呢幾年天水圍飛馬進步左好多，無論係人腳又好，整體戰術都好。年輕班，反擊速度快。呢幾年都有睇過飛馬既賽事，一次係畢特既第一場，南華VS飛馬。另一場係最近傑志對天水圍飛馬。飛馬，絕對唔係南華2隊，而係有實力爭本地港甲既BIG FOUR之一。以次前對傑志果場為例，其實傑志WIN得一D都唔輕鬆，新來投既麥基速度真係好快，中場既伊達同前鋒高梵都係有料既外援球員，果場傑志都係以1球勝3比2。

講返尋晚場波，南華會由上季下半季開始已經出現問題，卡里祖踢得唔好係事實，但球員狀態總有起跌，而家放左過飛馬我諗大家有眼見，一定實用過戴倫同基奧雲尼LAW。好記得對上一場南華對深水涉賽和後，強哥已經對教練團好不滿。老實講，踢左咁多場，南華都仲好似試緊陣咁，好多球迷都插，好無FORM。我相信高世安都係時候要走啦~~~尋晚最令我感到不滿既係南華呢隊波已經變左質，陳七，你響香港覺得自己係球星又如何?就係因為係淨係識攪球星款而不思進取，南華先會咁。唔止陳七，南華好多個華將都係咁。如果香港球員一成左名之後個個好似你咁擺球星款不思進取，我相信香港足球死梗!!!!!

公民VS傑志

數數手指，都成3個星期(差唔多成個月)無波睇啦，其他球隊唔計啦，淨係想睇傑志(因為俾無敵南_騙得太多次入場了)。先講賽果，大家賽和0：0。但老實，唔覺得傑志踢得差，反而係公民有兩位守將踢得好，守門員謝德謙同埋田中鬥莉王-趙俊傑。攻勢方面，其實傑志佔多既，多數都係俾右路盧均宜再高波吊入中間俾羅沙度，不過高空攻勢似乎對謝德謙無咩用，同埋羅沙度面對住趙俊傑響身位上好似無咩著數。另一策略就係靠梁子成攻門，子成今日真係一流，可惜好多球都射得好正，無咩角度，難唔到謝德謙..........對家方面，迪天奴既體能好左，踢到下半場尾段都仲有貨賣，不過論中場造波同掃蕩，公民今日真係差左D，隊長法圖斯今日仲溜左幾球波波，所以前面迪天奴同中村佑人要好多時要靠突撃反攻。

傑志方面，萬眾期待既林嘉緯終於響下半場尾段出返黎啦，期望下場可以睇到佢踢正選同佢既遠射!!!!另一方面，高文於今場下半場時段受傷，祝早日康復啦~~~

另外今日係我第一次帶小朋友到足球場睇本地足球，而且都係第一次響旺角場重建後第一次入旺角場睇本地甲組足球聯賽，對上一次入旺角場睇波已經係山度士踢告別賽既時候，真係好懷念旺角場既一切一切...............

新球季開鑼 The new season

大家唔好誤會，唔係英超﹑意甲OR西甲，係講緊本地既港甲，老實講，我都係上季開始先叫多返少少入場睇比賽，前季入場只係睇一兩場亞協既賽事，話曬有外隊黎會叫做好睇少少，本地球隊對賽前季俾我既感覺真係街波仔，點解我要俾60蚊睇??

上季其實連南華都係踢到好無FORM，所以轉左睇傑志，體力上當然無英超咁好睇，但戰術上絕對可觀。講返星期六場波，傑志VS晨曦，今季其實除左南傑兩支勁旅之外，好多支球隊都大力增兵，我自己就覺得有香港BIG FOUR啦，南華﹑傑志﹑晨曦同公民。所以傑志對住晨曦都唔易打。上半場係失望既，浪費左半場時間較陣，好在下半場追返1粒，最後和波收場。

南華衰D咩?

我好記得之前讀DEGREE既時候，其中一科係讀經營策略，裡面有一PART好深刻既係講一個成功，最多只係三年，三年之後要繼續維持係好難既一件事。最明顯既例子就係職業運動，即係賽車﹑足球﹑籃球........

南華，SOUTH CHINA，香港既一支老牌球隊，已經攞左連續4年既聯賽冠軍。要做5連霸，今年班主仲重金引入畢特同基士文，華人方面，全港最好既都響曬南華，但出黎既結果就真係強差人意.......到底衰D咩呢??

1. 南華一直以黎都想改變淨係識斬波靠高空攻門既問題，轉為打地波既小組進攻，但好明顯，迪天奴走左之後只係將斬波靠高空攻門變成斬向兩邊，由郭建邦或者係威廉追波，郭建邦都叫OK有速度，可以咁做，但威廉年紀大啦~之後再傳中俾T史高斯或者陳七攪，其實同之前斬波靠高空攻門既打法無分別LAW~
2. 今屆南華最大問題係後防，季初最錯係將利偉倫同卓卓借去飛馬，明知陳偉豪走，就應該留返D有經驗既後防。趙生跟本唔可以即刻買返黎就代替到陳偉豪。
3. 下半季買人，前鋒基士文﹑基奧雲尼跟本同外援前鋒T史高斯係同一類既前鋒，都係屬於技術形既射手，外援前鋒反而我覺得同一個TYPE既唔需要入太多，反而南華無一個速度形前鋒(即係似利物浦初出道既奧雲)而長人中鋒其實陳七都OK可以，不過只係同類前鋒太多啦~
4. 最大既問題係較陣，阿KIM SIR好明顯操好到佢地既體能，但真係無戰術可言.......陳浩然教細球會可以，但南華會太多大牌球星啦...........

2011的第一篇

如題，今日係8號，即係話遲左9日先發稿....呢排其實都幾忙下，又覺得好大壓力(其實我都唔知點解咁大壓力)真係你有壓力﹑我有壓力.......講起壓力呢樣野，我發現自己減壓既方法就係睇香港波啦~呢排一星期入兩次場，可想而知我既生活壓力有幾大呢~~~

第一場(香港VS廣東)即係省港盃
場波最後賽和1：1，成場波，都係郭建邦打得好，夠勤力，反而陳七傷癒之後仲未係狀態，早D換入卓卓既話，情況應該會有所改善。華人中場黎講，李海強真係超曬班，無得頂AR!!!!盧均宜都打得好好，不過老實講，港隊欠缺既係回默契。

第二場(傑志VS大中)聯賽盃
是日第一次去青衣場睇波，其實同小西灣比，都係咁遠，雖然去小西灣一程過，入青衣要轉車，但係去青衣會快D，青衣環境真係一流，唯一要彈既係對住墳境睇波同埋個場D射燈好唔得~賽果係傑志WIN4：1，入四強啦~~~~好開心，不旺我專程到場撐傑志~YEAH!!!!!

再談本地甲組

少有地近排入場睇甲組聯賽，戲碼係傑志VS四海流浪。仲要係第一次去將軍澳場，對我黎講都OK遠.......賽果係傑志WIN2:1，覺得傑志既足球比南華既實際得多。

尋晚既賽事係飛馬VS南華，地點係大球場。唔多唔少都係因為畢特效應入場，但結論係：南華WIN得好難睇.......可能你會問：WIN就係WIN，波係圓既，何謂難睇?簡單D黎講係球隊打唔出球迷既期望，即係我覺得如果要以60萬週薪請畢特，我寧願南華向熱剌借有用既外援好過，名氣唔代表一切，好認同伍健先生一句：「足球係踢11個人，11對腳既運動」。尋晚既賽事，基本上南華得郭建邦一個跑﹑肯去追波，全無組織可言.......其實上次入場睇南華已經有同樣感覺，無錯，體能上南華係有進步，但戰術上無可否認南華真係要大大改善。

港隊VS南華

尋日係我少有地專登去睇本地波，仲要係入小西灣，戲碼係港隊VS南華，雖然係免費入場，但入場數字真係少得可憐..........

結局係4:1，係南華炒港隊4比1，你無聽錯。集合全港精英既代表俾南華炒........我真係好傷心，點解香港足球攪成咁.......

1. 成班友無氣無力無體能，唔知點解有人仲話佢地表現已經好好，有改善.........

2. 巢鵬飛真係大哥到......等波到.......唔迫人......

3. 成隊跟本無心踢，好似諗住攞個港腳名就算，輸左就返球會繼續踢.....就好似剛過去世界盃既英格蘭一樣........

老豆話，可能班友留力踢........問題唔係在於留力踢既問題，係錯誤太多，有咩理由無人MARK史高斯??成場都無人理佢.......不如問南華想要幾多球，出聲啦!!!!直接D!!!!!

我真係對代表隊完全唔睇好..................

熱刺留學體驗團?

最近南華送左歐沖同郭建邦過熱刺訓練，其實有時我真係想問：「對佢兩個響球技上既成長真係有效?」首先，其實我想講，好耐之前文劍虹同吳偉超都去過英超學法，只不過係無咩點宣傳。其實只要有香港球員能出國留學，我已經覺得好高興。只係今次歐沖同郭建邦過熱刺跟操，真係似留學體驗團同做SHOW多，講真，你要進步既話，我唔信得1個星期多你可以升幾個呢~同埋TIMMING又係一個問題，有心俾球員出國留學，唔係話一﹑兩個星期，至少都一﹑兩年啦~我真係好突然，點解佢兩個咁快回港，如果只係取經之行，陳七果轉唔係已經睇過人地點TRAINING同經營??今轉去得果一﹑兩個星期為左咩??我真係唔係好明，係為左名氣定係有心更上一層樓LAW!!!!!!

絕地反擊

尋晚去左睇南華對尼夫治，幾年都無睇香港波既我，點解今次會走去睇波呢?原因好簡單：「我唔係南華FANS，我只係支持香港球隊，撐香港人~」亞洲足協對南華既不公平對待，令我要行出黎，著返件紅衫撐南華!!!!

睇完波之後，瑤瑤公公入左醫院，唔使問，即時就坐車去QE啦~結果成零晨兩點幾先上病房。唉~~~下午先出院，夜晚入返去~~~~~