口笛

女人三十不一定是年華老去，先送一曲<口笛>給我最愛的妳~三十，妳說是我雄飛之時，但妳不是變得更成熟更有女人味嗎?

「彷彿不管未來遇到什麼事，只要兩個人在一起就能微笑面對」

工作，你我也有新的環境。家，也有新的環境。不變的是我們還是一家人齊齊整整......

新的戰場

不知不覺間已經返左新工兩個星期有多，都開始適應了。最有趣既係如果夾到DUTY，可以同夫人一齊返A同返P放工返屋企。佢行五天，我就兩個星期三日O，所以有D部分時間大家雖然同更但會有出入。院舍俾我既感覺，工作量其實又唔叫太忙，不過話曬私院，要比較要求高。同埋總監，經理都對我對工作上同護理理論上有要求，耐不耐又會講下書，問下書。不過都算係咁，佢知我係新畢業，都好肯教野。今個星期其實都記得曬D院友既名，開始要去了解下佢地既病歷，唔係俾人問起書會唔識答.........

今日終於都去左佐敦科水，傑志既球迷會。同一時間，夫人同阿女去左科學館。大家齊齊科左兩舊水，佢就繼左康文署既博物館年票，我地一家三口，200蚊，都幾抵。傑志球迷會(藍浪)，我都係JOIN左家庭會員，好多時我地都係成家咁去JOIN一樣野，家庭就是這樣的~講開又講，自從返左新工之後，好多時都入唔到場睇波，希望亞協果陣唔好咁，所以RE DUTY睇波好緊要。今個星期五好好彩唔使返，可以睇到傑志VS港菁，老虎都要入場AR!!!!

(SMART雜誌送的多用途工具)

坪洲的一天

今日係家庭日，去既地方都係要坐車後轉船先去到，係一定要坐船，今次無陸路入去啦。去既地方係坪洲，唔係東坪洲。由馬鞍山出發，681巴士總站落車之後，中環碼頭坐船入去，唔係快船既話約40分鐘入到去。

寧靜既地方，一落船已經感覺好舒服。有少少似其他離島，不過今日去就唔係咁多人。唔識路既我地都係周圍行下行下先。

散心既話絕對係一個好地方，擺明就唔係購物點，SHOPPING既話就要出返中環。不過我地好明顯唔係黎SHOPPING啦，原本想去祺森冰室食野既，不過真係估佢唔到，下午4點就收工........

原來有街渡5分鐘就可以片到愉景灣，遠望重可以見到迪士尼樂園果兩間酒店，唔知夜晚有無煙花睇呢??

護理論理

未講故仔之前，先講下我對愛情觀既睇法，我覺得兩個人結婚既話，就應該從一而終，你未諗清諗楚既話就不如同居或者繼續拍拖算。不過好多人都係結左婚之後先至發覺大家性格不合而離婚收場.......我有親戚就係咁.......

咁同今日想講既野有咩關係呢?事原係親戚甲離左婚之後再婚，再婚既對象係一位內地女子，之後仲同親戚甲生左個女，即係大家成日講既非本地孕婦，又或者係單非。如果本身親戚甲因同佢前夫人因性格不合而離婚既話，其實我都唔會覺得有咩問題，只係同我既愛情觀唔同姐......不過我睇唔過眼既係：第一，親戚甲前夫人響我心目中係位賢淑既婦人，而再婚既女人我只感係一隻蝗虫.......所以到今時今日，我都無叫過果位女士一聲佢既背分專稱。第二，親戚甲PK到唔做野，一家大細攞綜援，之後申請埋果位再婚既女人落黎，都繼續唔做野，仲要同房署申請過間大D既屋話擠迫戶，政府仲要即時批。我想問點解我同夫人每天都工作，政府都批間屋俾我地，我地一定要出去買私人樓?

直到最近，果位女士好唔好彩患上左CA，理論上，身為一個護士係唔應該有偏見，但唔好意思，我真係做唔到無偏見。不過佢好彩唔係我既病人。尋日做節，果位女士情況都幾唔樂觀，已經開始有明顯既腹水，佢患既係Ca Ovary，美恩剛好係果科既護士，佢問我需唔需要了解下有咩要協助，講真，我真係做唔出主動去關心一隻蝗虫.......仲要因病而家申請埋她母親來港........又多隻蝗虫.......我想問一句：「當你面對一個厚顏侵吞你應有的社會福利，而又不去為社會作出貢獻的病人時，你會記得什麼是護理論理嗎?」老實說，什麼不傷害，誠實.....我會做到，但我卻除不下我那副有色眼鏡.......

一週記趣

其實呢個星期都係放假，響屋企HEA HEA既，不過好在都叫多左好多空閒時間，可以同朋友去食下TEA，見下面。先講今日先~今日其實係各有各精彩，個女同嫲嫲去左食飯，夫人又要返工，我就第一次去左深水涉運動場睇波波。今日既戲碼係深水涉VS傑志，結果係傑志小勝1:0。場波傑志攻勢佔多，盧比度叔叔同林嘉緯正選上陣，盧比度叔叔無狀態，個人認為出梁子成拍返奇兵羅沙度進攻會較實際，不過米高就走，而且盧比度復出，所以甘教頭將羅沙度放返後面打DF。嘉緯正選上陣，有膽色，進攻方面都策動多左攻勢，不過D遠射就未返黎。

尋日星期六就比較充實D，朝早就去左沙田IVE既OPEN DAY，參觀左幾個沙田IVE既學系，好多野睇。同大佬豪一齊去，以前佢都響沙田IVE讀過3年書，佢都話而家沙田IVE既環境靚左好多。之後下午就會合返阿女同夫人，去左馬會響彭福公園既活動，原本無飛GA，不過好在最後都有3張，可以一家大細去，好好玩，而且環境好好。多謝BRENDA先~~

獵人遊戲

前日一返到屋企，夫人叫我同個女一組，佢自己一組，大家行唔同路線，15分鐘後響恆安麥當奴等，到底點解要咁呢?

原來阿女同夫人睇兒童雜誌，有個幾有趣既遊戲，我叫佢做獵人遊戲，遊戲玩法好簡單，任務紙上面有好多樣唔同既東西你需要去尋找，例如小狗﹑麵包店等，之後大家行唔同既路線，於指定時間內尋找，之後約定響指定地點集合，睇下邊個搵得多D..........

喪玩一天

如果兩夫妻都係輪更既話，其實真係幾多對更時間，除非一齊re duty，否則見面既時間真係會好少。而星期六﹑日返工更加係家常便飯，所以家庭日對於我地黎講，真係好重要。所以今次決定響香港有咁遠去咁遠，一於散下心。夫人成日都話我好鍾意去遠離城市既地方，貪佢夠清靜......

今次去既地方係離島，第一個地點係大澳，仲要係打完風之後去.....視察民情??雖然而家入大澳交通方便左好多，但我地都堅持由東涌坐船入去。(夫人，我地窮就去大澳，有錢我地去威尼斯)

其實入大澳散心真係幾舒服ga，坐響間望住大澳棚屋景色既coffee shop飲野，真係好舒服。之後我地仲坐快艇出去遊船河，好抵玩，20蚊每位約半小時。

話明喪玩，梗係唔會就咁返屋企啦，個女同我死都要坐360，結果我地就專登響大澳坐11號巴士入昂平坐鑬車，仲要係坐水晶車箱添.........

老是一件令人回味的事

每次寫BLOG，第一句一定係好耐無寫....無時間寫.......都係入正題啦，原本今日係想分享呢期與夫人閒談「老化」的問題，即係白頭到老時。但今日睇到新聞，見到水務署既長跑賽事出左好多意外，有成20個跑手不適，一定要講下野先。老實講，就算幾有經驗既跑手都好，一定唔可以輕視每一場既賽事，算你跑慣馬拉松，10公里沒有什麼大不了，都可能會有好多因素影響，例如天氣﹑跑手狀態。我好相信今次出事既跑手都唔係突然間即興報名，事前都應該係有練習下既，但年紀﹑體能應唔應付得到又係另一個問題，好似我咁，成日有種錯覺仲係中學年代既我，爛船都有三斤釘，而事實上，少練習再加上無狀態﹑無體能情況下，如果再強行跑既話，好大機會會出意外，唔係話要大家無堅持，重點係要知道自己有機多。

返正題，今日想分享既係白頭到老既話題，如果係兩夫妻退休後搵間小屋養老，每天拍拖散步，看海睇日落梗係好啦，問題係眼見好多白頭夫婦都係老公中風，老婆日日同丈夫醫院過，老公出院入老人院，兩夫婦唔能夠一齊之餘，個老公仲好快行先一步，就算未係時候，都係痛苦，好多時老婆婆眼見老公公中風之後都會幻想佢會好返，但好多時都係失望。我好記得有一日我問夫人，如果大吉有日白頭，我中了風，你會怎樣?夫人說當然會照顧我，但相反，夫人說如果自己中風，則希望我讓她餓死去，不要以護理知識去為她轉身﹑插胃喉﹑尿喉。老實說，如果真的有這一天，為了滿足我而加添妳的痛苦，我不願你離開我，是我自私.........我只好尊重妳........

給天使看的戲 Drama for the angels

heero既大婚情況本來想響上星期post多D，都係果句啦：「好忙」。其實忙d咩呢??今日係我個女既幼稚園畢業既大日子，作為父親，有喜也有悲。響靈糧幼稚園三年既光陰，小孩子得到d咩呢?首先第一樣野想先多謝幼稚園既每位老師對我個女既付出，特別係佢K2既班主任鍾老師，雖然已經唔響學校任教，但都要講句多謝。雅瑤緊張既時侯會有咬手指既問題，老師們都有一一跟進。眼見女兒升小學，總覺得佢大個左，有自己既主見(雖然好多野都好無POINT，畢竟仲係細路女)，但真係好開心。

女兒畢業，為何有悲?我相信每個父母都會對自己的小孩子有期望，坦白講，我都有，我從來都無諗過佢係人中之鳳，學業成績巴巴閉。只係想佢幼稚園呢三年學識最基本既自我照顧，總希望自己個女吃多些苦，夫人太愛佢﹑太保護佢，反而未必係一件好事，遇到好少既問題，雅瑤都會唔識點去處理，呢樣野我反而最擔心。有時覺得佢呢三年幼稚園太SHOW OFF佢地既小朋友既才能俾我地家長去睇，但我唔係想要一個多才多藝既女兒，我好簡單，如果佢學識最基本既自我照顧﹑學懂謙卑﹑尊重﹑關心別人，其實我已經好心足了。真的無必要SHOW OFF佢既才藝來取悅我。另一感到不悅的是：孫明揚為我女兒學校結業禮的嘉賓之一，請恕我直言，我一點也不覺得佢係社會賢達，如果因為佢係局長就要請佢到，那麼對不起，作為父親的我有責任去教導我的下一代去明辨是非。一個人是否賢者達人，並非在乎他的官位，為官者更要以民為本。試問一個遇到問題只懂逃避，為人也沒有操守之人來為我女兒作畢業典禮作嘉賓，只想問一句：「你何德何能?」

復活節的話，人也應該復活一下吧!

四日既復活節假期期待已久，夫人同細妹帶埋個女去左大陸旅行，可能大家會問我點解唔去，有D時候，真係想俾自己休息一下，或者係做D自己喜歡既事。就好似呢幾日咁，終於有時間執下NOTES﹑租下碟﹑寫BLOG，同埋約朋友食下TEA，吹下水(真係好耐無見過少婷啦，今日約去食下TEA。前2晚又有時間同英偉哥落街吹下水)。
呢3日，一口氣睇左3部之前無時間入戲院睇既港產，包括劍雨﹑我愛香港﹑狄仁傑。手頭上仲有一部孔子決戰春秋。個人而言，覺得喜劇要拍得好其實有一定難度，我愛香港俾到我真驚喜(同埋個人本身幾撐梁家輝)武俠片方面，劍雨反而一般，動作片黎講，劇情真係一般。反而我對狄仁傑之通天帝國既評分幾高，有劇情，李冰冰﹑華仔演得好好。
講返老友，事原英偉哥隻眼生左粒野，之後就約左我落街吹下水啦，真係好耐無見佢老哥啦，而家PTU之後轉左去東涌做CID，東涌環境好AR~~~有時發現，人大左，久不久大家見下面會有唔同既體會，好似上星期咁，HERRO結婚，大家談論買樓既問題，又估唔到，佢太太都係NURSE，未見其人，但感覺上已份外親切。而我呢?總感到大家每天都在努力，我也會比心機呢~~~

我與女兒

我好相信天下間每一個父親也會愛護自己的孩子，自問自己也是，但做得非常差。雅瑤自出娘胎以來，旦白講，我很懶，很少會親手去照顧雅瑤，包括沖涼﹑換片﹑餵奶，就算是心血來潮，夫人也比我熟手，雅瑤也喜歡由媽媽處理。故此，當雅瑤漸漸長大，總覺得性格上與女兒不合。
夫人的朋友也會問我讀了護士後，會否對我照顧女兒有幫助。答案一定是有，但只限於護理兒童上的技巧。與雅瑤的相處仍存在很大問題，簡單而言，大家不懂得去溝通。
很記得上一次父女爭吵是因為雅瑤無理地把我的STICKER當貼紙玩耍，全數取去，一張不留。我即時既反應其實沒有鬧佢，只係想問個明白點解要咁做，之前都同你講過係爸爸既東西，不是玩具。但瑤瑤可能知道自己做錯了，所以不敢出聲，也沒有回答我既問題，結果我覺得佢好無禮貌，就鬧到佢哭了~~~~夫人回來時，冷靜地處理事件，佢認為小朋友其實已知道錯了，只是不懂得去表達，所以其實對他說下次不要就可以了。担白講，我好相信無人一生出黎就識點做人老豆老母，所以我到今日都仲學緊點做.........

露營相集

野外定向小玩意

除了營地活動，都有到附近看風景

營幕內的雅瑤

玩風爭中

與其他小朋友遊玩

露營後記

剛剛過去既星期六﹑日，我地成家去左西貢露營，不過就今日先將內容寫上BLOG，真係罪過...........

講返今次既家庭活動，我諗係我成世人最辛苦既一次，真係.....食又唔係好﹑訓又訓唔好，仲有牛屎......不過都叫值得既~地點係西貢既灣仔，如果想去既話可以先坐車入西貢市中心，再坐小巴入海下灣，之後要行半小時既山路。係，我無打錯字，地點叫灣仔，而且仲要係響西貢。注意既地方係大家既手提電話，有部份台會響海下灣開始收唔到或者係轉收國內。

灣仔有分南營同北營，我地今次去既係北營，唔係露營區切勿亂露營，會收告票GA!北營就大D，不過就大早地一個，南營就靠碼頭，有時會有私人船載客出黃石碼頭。食物方面都係以乾糧同即食麵﹑通粉為主，有帶輕便GAS爐，主要用黎BOW下水..........

數碼港一天遊

都有成個幾星期無UPDATE個BLOG啦，今日又寫下野先~其實呢排夫人TAKE左COURSE響HKU上堂，所以有時星期六我會帶埋瑤瑤過海接佢放學。尋日就成家去左數碼港啦~

其實數碼港好老實講，有商場，但絕對唔適合SHOPPING。不過環境又真係幾OK既，影相就絕對係好地方~下週家庭生活預告：「西貢露營」

Post 下D舊野，換下BLOG先~

石頭記2

石頭記

尋日同夫人﹑阿女一齊去左西貢蕉坑既獅子會自然中心，因為夫人上午有堂要上，所以比較遲入到去，好多展館都收4:30，連買菜都買唔到~~~~
最初仲以為係重來未去過既新奇地方，係~我真係未去過!不過去到之後，阿女已經第一個講：「上年幼稚園黎過，胡爸，我帶你參觀AR~」原來係得我一個未黎過..............

回到童年的LEGO時代

近排唔知點解，出親街都會買LEGO俾瑤瑤，今日出銅鑼灣，又買左隻LEGO人仔。我同夫人講，細個果陣我爸爸成日都會買LEGO俾我，逄星期日爸爸放假，我一定捉爸爸去萬寧買LEGO俾我，果陣萬寧係有LEGO賣GA!!!!!夫人反問我：「咁你而家D LEGO呢?」都咁多年啦，咩玩具都俾曬人啦~不過我真係好想要返D LEGO，果時仲記得自己買親既都係戰爭既士兵仔.......而家都好少出.........

而家D LEGO比起細個果陣真係多好多唔同既題材，連最HIT既動畫都有LEGO出，好似反斗奇兵同反斗車王..........上圖就係近排夫人買俾瑤瑤，反斗車王既LEGO。

以前LEGO既人仔就無得就咁一隻買既，而家先有，不過就咁一個LEGO人都賣成差唔多20蚊一隻，但同我細個果陣一樣不變既，就係都係咁貴~~~P.S. 我細個果陣好鍾意交換D LEGO人仔既頭髮同道具。

時代變左，我細個就鍾意玩士兵，我阿女就鍾意城市系列多D。上年佢生日，佢姨姨仲送左架LEGO消防車俾佢添..............

雅瑤近照3

雅瑤近照2