關西之旅 Day 2

今日先黎POST一POST關西之旅既DAY 2行程先（其實一早已經打左一大半，不過未得閒POST），第二日行程一開波都係坐阪急電車，主要目的地係神戶，但我地會先去有馬，可惜既係無浸到酒泉。

黎到有馬唔浸溫泉其實都有好多景可以影下相，一黎到第一件事團長推介我地可以買當地既炭酸煎餅返港做手信，不過我就無買到，反而響其中有間手製玻璃飾物既店，佢D飾物都幾精美，我就買左條送俾朋友～另外有間叫竹中肉店既鋪，極力推介黑毛和牛既炸物！

由於係溫泉區關係，呢度有炭酸水出產，所以呢區好多燒餅店都有頭先所講既炭酸煎餅賣。大佬豪就話旅遊書寫沙糖加炭酸水可變波子汽水，千奇百趣呢～除左炭酸煎餅，好多店都有松茸買。

離開有馬之後，下一場我地黎到新長田尋找鐵人28同三國志之旅～日本真係好有趣，如果想一個唔多人流既地點增加人流，方法就係攪D主題等多D人黎。即係好似三國志館咁～本人既意見：三國志館影相遊覽無問題，除左有一主題館要俾錢入之外，其他都係免費的，但紀念品真係唔好買，淘寶起碼平三倍。

響新長田留左一陣，之後我地就出發去舞子公園啦～舞子公園附近其實有好多景點可以參觀，不過係有料的～但我地最後都選擇左上明石海峽大橋參觀，位位300YEN。附近有一個叫移情閣既，其實係孫中山紀念館，都幾靚，不過都係有料參觀，有興趣既朋友可以自己去下。

沿舞子公園海灘行行下，我地去到大出血之地，OUTLETS AR～～～好平，好得。絕對係SHOPPING好地方。之後我地帶住大家既戰利品離開神戶，返難波 食四天王拉麵晚餐。