關西之旅﹣DAY ONE

話咁快七日既日本關西之旅又玩完啦，今次我同中學同學四條佬去既日本關西之旅，主要去左大阪､神戶同埋京都，行程密到阿媽都唔得，但一定要先多謝我地唔收小費既領隊大佬豪先～

四條佬去分AB，我同大佬豪坐PEACH AIRLINE，其餘兩條友就國泰CX。2100響馬鞍山出發坐零晨機，大約當地時間0530到達關西空港。等埋坐CX果兩條友大約0600到達後，0700我地響關西空港既TRAVEL DESK買套票，極力建議大家買3 Days Kansai Thru Pass，可節省不少旅費！買套票後我地先坐南海電鐵等空港急行到難波去位於心齋橋附近既酒店放低行李先，跟住就出發去我地第一站﹣嵐山

嵐山，由心齋橋站先搭地鐵到梅田後再轉阪急列車向京都河原町方向出發，再響桂站轉車到 嵐山。到步後，我地先去左嵐山公園､之後去左渡月橋､天龍寺。第一餐既午飯就係響嵐山食烏東啦～由於大家落機後去酒店放低行李就即刻出發，所以大家既疲勞度都有返咁上下，好坐鐵路中有得訓下，如果唔係就真係大檸樂～

去到日本梗係要影番D有特色既野啦，和服妹妹一定要影啦～唔係點返香港同巴打們交差AR～今次日本之旅陪住我周圍影既除左CANON既500D之外，佢既好拍檔我選左50MM 1.8同埋70﹣200MM既小小白，問題就係兩支都係人像鏡，影景就PK啦～

食飽飽之後，我地出發去下一個景點，嵯峨野坐呢個觀光小火車，源路既景真係靚到爆～其實除左火車遊嵯峨野之外，原來仲有激流船叫咩X野保津峽遊覽船，不過今次就無機會坐啦～

嵯峨野之後，我地響JR馬堀站坐左去宇治既中村藤吉本店去食綠茶雪糕，價錢大約800﹣1000YEN，都唔算平，不過都好多學生妹等位食，日本人D消費力真係強到呢～～～之後就順便去左平等院表參道，不過平等院關下午5點，又要俾入場費，最後我地無入到去，去左附近既宇治橋同宇治川影下相，影夠本就響宇冶站坐京阪電車到中書島站再轉車返大阪啦～

第一日既晚餐我地響道頓堀既千房食燒餅，不過可能真係太疲倦，我病病地，PANADOL都食左兩粒～好孱AR！！！