退伍軍人病(Legionnaires’ Disease)

點解今日無神神講呢?咪因為之前新聞話有位官員患上左MA，好嚴重GA??為左俾各位對呢個個名怪怪地既疾病有進一步既認識，唔寫唔得啦。

(小丑派一派膠先)

所謂既退伍軍人病，並唔係因為你當過兵退左休之後會患上，雖然染病高官成個退休樣......呢個病之所以叫退伍軍人病，由來係響1976年，有班退伍美軍響費城參加完GATHERING之後，其中有部份人出現肺炎同埋呼吸道感染現象，之後仲有30幾人死左，唔使問，之後都係一個驚字啦，由於原因不明，所以就叫「退伍軍人症」（Legionnaires' disease）。直至1977年，科學家先發現致病既細菌：嗜肺性退伍軍人桿菌 (Legionella pneumophila) ，呢隻菌可以響水同泥土度生存，對熱 (60 ℃）同酸都有耐受性。所以大家而家明白點解要去政府總部抽水啦，雖然政府成日都派膠俾人抽水。

每種傳染病都會有佢既傳播途徑，而退伍軍人病通常都係經嗆入受該菌污染的水，或者係從空氣中吸入含有該菌之氣霧而受感染。

症狀方面，嚴重者會發高燒、發冷、乾咳或者有痰。而部份人則會有肌肉痛、厭食、倦怠、頭痛、腹痛及腹瀉等症狀，或有可能引致肺炎。輕微症狀患者就會有發燒同埋肌肉痛，但唔會有肺炎，一般會響2至5日內不藥而癒。嚴重症狀患者潛伏期大約2至10日，輕微症狀患者則只有幾小時至2日。

治療方面，會以抗生素治療，通常以紅霉素為首選。