道理哥的智慧

尋晚返P，放左工之後真係無諗過夫人會約左細妹出左老尖，之後仲帶埋阿女去細妹香港仔度訓，今日夫人仲要上堂，都唔知佢知唔知醒..........

尋晚既晚飯，細妹道出左佢仕途上既不愉快，其實唔止係佢，好多身邊既朋友都成日問同一個問題：「到底幾時先有出頭天?30歲?40歲?事業上先有成就??」其實如果你問我呢個問題，我會好老實答，你想有出頭，先要放下急功既心態。」如果你想響一間公司做一﹑兩年就有得升，我會好老實咁講：「以現時既環境，無可能。就算有得俾你升，都未必係一件好事，可能只係公司無人才。」做人既野，順風順水未必係一件好事，反而跌多幾次，將來可能反而會幫到你去面對困難。大鑊?咩野叫做大鑊?仲有命仔﹑有鬥心繼續做既話，將來望返轉頭，又有咩咁大不了呢?如果真係覺得而家無得發圍，咪守下先等機會LAW，不過唔好淨係坐住等，得閒充實下自己將來一定有機會用得著。